Эндиликда пенсионерлар ва ижтимоий нафақалар олувчилар реал вақт режимида SMS-сўров орқали пенсия ва нафақалар миқдори ва тўлов муддатлари ҳақидаги ахборотни сўраб олишлари мумкин бўлади.

Хизматдан фойдаланиш учун 10711 рақамига пенсия гувоҳномасида кўрсатилган пенсионер ёки ижтимоий нафақа олувчининг шахсий ҳисобварағи рақамини (етти белгили рақам) сақлайдиган SMS-сўров жўнатиш зарур.

Пенсия жамғармаси хабарида қайд қилинишича, мазкур янгилик Молия вазирлиги ҳузуридаги бюджетдан ташқари Пенсия жамғармаси томонидан “Пенсия” автоматлаштирилган дастурий мажмуидан фойдаланиш йўли билан жорий қилинди. Ҳозирги вақтда “Пенсия” ДТ Пенсия жамғармасининг туман (шаҳар) бўлимлари томонидан амалга ошириладиган давлат пенсиялари, ижтимоий нафақалар, компенсация тўловлари ва бошқа тўловларни тайинлаш ва тўлаш бўйича барча жараёнларни амалга оширади.

Пенсия жамғармаси вакилининг қўшимча хабар беришича – хизмат бепул кўрсатилади.

Манба:norma.uz сайти