НАВБАҲОР ТУМАНИДА ҚОРАМОЛЧИЛИК ВА ТУЯҚУШЧИЛИК ТАРМОҚЛАРИ РИВОЖЛАНИБ БОРМОҚДА
Ўзбекистон Республикаси Президентининг 2019 йил 28 мартдаги “Ўзбекистон Республикаси Ветеринария ва чорвачиликни ривожлантириш давлат қўмитаси фаолиятини ташкил этиш чора-тадбирлари тўғрисида”ги ПҚ-4254-сонли Қарори ижроси доирасида Республикамиз худудларида кўплаб янги лойиҳалар ҳаётга татбиқ этилмоқда.
Хусусан, Навоий вилоятининг Навбаҳор туманида ташкил этилган “EVROSOMSTREAM” МЧЖ қўшма корхонаси шулар жумласидан.
Ҳозирда қорамолчилик ва туяқушчилик йўналишида фаолият олиб бораётган ушбу корхонада Жанубий Африка Республикасидан олиб келинган 30 бош туяқуш жўжалари, Венгриядан олиб келинган 110 бош қора-ола ва 61 бош симментал зотли қорамоллар парвариш қилинмоқда.
“Корхона томонидан наслли қорамаолларни кўпайтириб, республика бўйлаб етказиб беришни йўлга қўйишни мақсад қилганмиз. Халқ банкидан 1 млрд 600 млн сўм кредит олиб, Венгриядан яна 62 бош симментал зотли буғоз ғунажинлар, 117 бош голштин зотли буқа бузоқчалар олиб келдик. Давлат ветеринария хизмати ходимлари томонидан берилган тавсиялар ва кўрсатилган ветеринария хизматлари натижасида туяқуш жўжалари соғлом вояга етказилмоқда. Корхонамизда туяқушчилик тармоғини ҳам кенгайтириш ниятимиз бор”, – дейди корхона раҳбари Жамшид Ҳамроев.
Бугунги кунда туманда чорвачилик соҳаси бўйича жами 227 та фермер хўжаликлари, шу жумладан, 27 та қорамолчилик, 132 та қўй-эчкичилик, 15 та паррандачилик, 48 та балиқчилик, 1 та йилқичилик, 2 та қуёнчилик ва 2 та асаларичилик йўналишидаги хўжаликлар фаолият юритмоқда.
Шунингдек, туман ветеринария ва чорвачиликни ривожлантириш бўлими мутахассислари томонидан барча чорвачилик хўжаликларига ўз вақтида Давлат ветеринария хизмати кўрсатиб келинмоқда.
Манба: http://vetgov.uz сайти
